မြန်မာနိုင်ငံ အဂတိလိုက်စားမှု တိုက်ဖျက်ရေး ကော်မရှင်က ရန်ကုန်တိုင်းဒေသကြီး ဥပဒေ အရာရှိချုပ်နှင့် တာဝန်ရှိသူ ၅ ဦးကို လူသတ်မှုတခုတွင် အမှုရုပ်သိမ်းပေးရန် လာဘ်ငွေရယူခဲ့ခြင်းအတွက် အဂတိလိုက်စားမှုတိုက်ဖျက်ရေး ဥပဒေဖြင့် အရေးယူရန် ဆုံး ဖြတ်လိုက်ခြင်းက တရားစီရင်ရေး စနစ် အပါအဝင် အစိုးရ၏ ကဏ္ဍတိုင်းတွင် အကျင့်ပျက်ခြစားမှု ကာလရှည်ကြာစွာ ပျံ့နှံ့ စွဲ ကပ်နေသည့် နိုင်ငံတခုတွင် မှတ်တမ်းဝင် လုပ်ရပ်တခု ဖြစ်သည်။
အဂတိ လိုက်စားမှု တိုက်ဖျက်ရေး ကော်မရှင်၏ စက်တင်ဘာ ၁၃ ရက် ထုတ်ပြန်ချက်အရ အရေးယူခံရသူများမှာ ရန်ကုန်တိုင်းဒေသကြီး ဥပဒေချုပ် ဦးဟန်ထူး၊ တိုင်းဒေသကြီး ဥပဒေအရာရှိ ဦးသိန်းဇော်၊ ရန်ကုန်အရှေ့ပိုင်းခရိုင် ဥပဒေအရာရှိ ဦးကိုကိုလေး၊ ဒုတိယခရိုင်ဥပဒေအရာရှိ ဒေါ်သစ်သစ်ခင်၊ ဒုတိယခရိုင်တရားသူကြီး ဦးအောင်ကြည်နှင့် တိုင်းဒေသကြီးရဲတပ်ဖွဲ့ ရွှေပေါက္ကံနယ်မြေစခန်းမှူး (ယခင် သုဝဏ္ဏနယ်မြေစခန်းမှူး) ရဲအုပ်ချစ်ကိုကို တို့ဖြစ်ကြောင်း သိရသည်။
အကယ်၍ စွပ်စွဲခံရသူများက အပြစ်ရှိကြောင်းတွေ့ ရှိခဲ့မည်ဆိုလျှင် အမြင့်ဆုံးထောင်ဒဏ် ၁၀ နှစ်မှ ၁၅ နှစ် အထိ ကျခံရမည် ဖြစ်သည်။ ထိပ်တန်းအဆင့် တာဝန်ရှိသူများ ပါဝင်နေသည့် ယခုအမှုက လွန်ခဲ့သော ၂ နှစ်က စတင်ဖွဲ့စည်းခဲ့သည့် ကော်မရှင်က အမှုဖွင့်နိုင်ခဲ့သော အမှုများထဲတွင် လူသိအများဆုံး ဖြစ်စေခဲ့သည်။ FDA ညွှန်ချုပ်ပြီးလျှင် ယခု အကြိမ်သည် “ငါးကြီး”များ ထပ်မံဖမ်းမိခြင်းဟု ဆိုရမည်။
အကြီးတန်း ဥပဒေ အရာရှိများ လာဘ်ငွေယူသည့် အလေ့အထသည် ကာလရှည်ကြာစွာ လူတိုင်းသိသည့် လျှို့ဝှက်ချက် ဖြစ်သည့်အတွက် ယင်းအပေါ် ရွံရှာမုန်းတီးနေသော မြန်မာနိုင်ငံသားများကြား ကော်မရှင်၏ လုပ်ဆောင်ချက်က ထောက်ခံမှု အခိုင်အမာ ရရှိခဲ့သည်။
ငါးကြီးများကို ဖမ်းနိုင်ခဲ့ခြင်းအပေါ် ပြည်သူအများစုက ကျေနပ်ကြသည်။ အဆင့်မြင့် အရာရှိများ ရာထူးမှ ဖယ်ရှားခံရခြင်းကြောင့် မဟုတ်ပါ။ အဆင့်မြင့်အရာရှိများကို ပစ်မှတ်ထားခြင်းက အကျင့်ပျက်ခြစားခြင်းကို ရပ်တန့်စေမည့် အကောင်းဆုံး နည်းလမ်းများထဲမှ တခု ဖြစ်ကြောင်း ပြည်သူများ သိကြ၍ ဖြစ်ပါသည်။
၂၀၁၃ ခုနှစ်တွင် အဂတိလိုက်စားမှု တိုက်ဖျက်ရေး ဥပဒေကို အတည်ပြုခဲ့ သော်လည်း ယခင်သမ္မတ ဦးသိန်းစိန် အစိုးရလက်ထက်တွင် အကျင့်ပျက်ခြစားမှုကို ထိရောက်စွာ မကိုင်တွယ်နိုင်ခဲ့ခြင်းကိုလည်း မမေ့ကြပါ။
ထို့ကြောင့် အပြင်တွင် လွတ်နေသေးသော ငါးကြီးများ ဆက်ဖမ်းရန် ကျန်နေသေးကြောင်း ကော်မရှင် အနေဖြင့် သတိရှိရန် လိုသည်။။ အဂတိလိုက်စားမှုကို တိုက်ဖျက်ရေးက အမျိုးသားရေး တာဝန် ဖြစ်ကြောင်း ဥပဒေတွင် ဖော်ပြထားပါသည်။ တချိန်တည်းမှာပင် စွပ်စွဲခံရသူများကို ကော်မရှင်က မည်သည့် အတိုင်းအတာအထိ အရေးယူဆောင်ရွက်မည်ကို ကျနော်တို့ စောင့်ကြည့်ကြရမည် ဖြစ်သည်။
မေလအတွင်းတွင် စီမံ/ဘဏ္ဍာရေး ဝန်ကြီးဟောင်း ဦးကျော်ဝင်းအပေါ်တိုင်ကြားမှုများ လက်ခံရရှိခဲ့ပြီး စုံစမ်းစစ်ဆေးမှုတခု ပြုလုပ်ခဲ့သည့်တိုင် အဂတိလိုက်စားမှုတိုက်ဖျက်ရေး ဥပဒေ ဖြင့် အရေးယူရန် လုံလောက်သည့် အထောက်အထား မရှိကြောင်း ပြောဆို၍ ဥပဒေကြောင်းအရ အရေးယူရန် ကော်မရှင်က ငြင်းပယ်ခဲ့သည်။ ယခု လူသတ်မှု တခုကို ရုပ်သိမ်းခဲ့သောကိစ္စတွင် တိုင်း ဥပဒေအရာရှိချုပ်နှင့် အခြားသူများပါဝင်နေခဲ့ခြင်းကို ကော်မရှင်က အမှုဖွင့်ခဲ့ခြင်းမှာ အများပြည်သူ၏ ကန့်ကွက်ပြောဆိုမှုများကြောင့် သမ္မတက ကြားဝင်လာရပြီး အမှုကို ပြန်လည်သုံးသပ်ရန် တောင်းဆိုခဲ့ပြီးသည့်နောက်ပိုင်းမှသာ ဖြစ်သည်။
အစိုးရက တရားဥပဒေစိုးမိုးရေးကို အကောင်အထည်ဖော်ရန် ၎င်း၏ ကတိကို အလေးအနက်ထားကြောင်း သတင်းစကားပေးပို့လိုက်ပုံရသော ယခု လုပ်ရပ်က စီးပွားရေးဆိုင်ရာ စီမံခန့်ခွဲမှု အလွဲများ၏ သက်ရောက်မှုများကို ရင်ဆိုင်နေရသော ပြည်သူများ၏ စိုးရိမ်မှုများကို လမ်းကြောင်းလွှဲမှုတခုလည်း ဖြစ်နိုင်သည်။
သို့သော်လည်း ယခုအချိန်တွင် အဂတိလိုက်စားမှု တိုက်ဖျက်ရေး ကော်မရှင် ဥက္ကဌ နှင့် သူ၏ အဖွဲ့တို့ ဂုဏ်သိက္ခာ တက်နေသည်။ ကော်မရှင်က သိသာမြင်သာသော ရလဒ်တခု ဖော်ဆောင်နိုင်၍ ဖြစ်သည်။ အကယ်၍ စုံစမ်းစစ်ဆေးစဉ် အတွင်းအထက်မှ တစုံတဦးထံမှ မည်သည့်ကြားဝင် စွက်ဖက်မှုမျိုး ရင်ဆိုင်ရသည်ဖြစ်စေ မည်သူကိုမဆို အရေးယူဆောင်ရွက်ရန် နှင့် သူ့ထံသို့ သတင်းပို့ တိုင်ကြားရန် သမ္မတ ဦးဝင်းမြင့်က အခွင့်အာဏာပေးထားခြင်းလည်း ရှိနေသည်။ တိုင်းပြည်တွင် စွဲကပ်နေသည့် အကျင့်ပျက်ခြစားမှု ကင်ဆာကို ဖယ်ရှားကုသရာတွင် အရေးပါသော ကုထုံးကို စတင်နေပြီဟု ဆိုအပ်ပေသည်။
No comments:
Post a Comment